Hoi allemaol,
Hie sjtaon veer dan eindelik, de hougste tied um de scepter door te geve. Klaor um aafsjied te numme van os besjtaon es Preensepaar. Drie jaor geleeje sjtarte veur os ut carnavalsseizoen mèt de toezeggink aan os vrung Gaston en Manon (ut oud Preensepaar van de Rieste), um hun te ondersjteune en te hellepe en deil oet te make van hun geheim. Veer zaote dus bie hun in het complot. Wiste veer toen veul tot veer op 18 januari 2020 zelluf bie de Nachdraversj zouwe oetkomme es nuuij Preensepaar. Umtot veer neemes get vertèlt houwe waor ut ein groete verrassing (of sjock). Neet allein veur os ouwersj, Eline en Myrthe, os familie en vrung, mèh veural veur Gaston en Manon. Neemes hou gedach tot veer zoe get zouwe doon en ut geheim koste houwe, veer zelluf eigelik aoch neet. Missie gesjlaag zègke ze dan.
En zoe sjtarte veur os, mèt mer un hiel korte veurbereiding, ut avontuur es Preensepaar. Wat höbbe veer ut sjiek gehad! Vanaaf ut moment tot veer jao zeije, de veurbereding mèt Sjef en Erik, os oetrope, de drukbezochte receptie, alle carnavalsactiviteite en natuurlijk dur groete optocht, fantastisch! En dat same mèt os jeugpreensepaar, Preens Rick en Preenses Lotte, die os polonaise in en oet höbbe getrokke. Wat höbbe veer same gerend en veul sjpas gehad mèt die twie. Daoveur wille veer hun bedaanke.
Tot os Preenseparesjap drie jaor zou doere, houwe veer neet veurzeen. In 2021 kos of moeg bienao nieks en höbbe veer os bès gedaon om dur on-line gèt van te make. In 2022 moeg un week veur Carnaval opins weer alles esof het virus neet mie besjtong. Veer zunt dur trots op tot de Nachdraversj en Rieste zoe kort van te veure toch nog unne optoch en un carnavaslfeeske höbbe kinne organisere. Mèh oeteindelik waor 2020 toch eigelik os jaor! Alle oetwisselinge, recepties, dames en hierezitting, sjleuteleuverdrach, bejaarde en ziekebezeukskes, veer zunt dur vol veur gegange. Zoe veul mèt gemaak, tot en met de carnaval waor 2020 ech geweldig!
Es bonus mochte veer dit alles same belèève mèt us vrung, Gaston en Manon. En neet te vergèète Levi en Lynn, het oud jeugdpreensepaar van de Rieste. Iech zeen os nog sjpringe mèt os achte op dur wagen in de lempkesoptocht. Wat waor dat sjiek!
Bèste familie en vrung, leef luuij van Termaar en Mergraote, collega’s van de Rieste en os eige Nachdraversj en Nachdraverkes en ederein dèh veer noe natuurlijk vergete te numme, hartsjtikke bedaank veur al euch hulp, sjpas en plezeer. Mèh veural veur unne super, fantastische Carnaval! Carnaval is ut fees van verbinding, veer höbbe in eeder geval unne haup vrung en familie durbie gekrege! Veer wunsje der nuuje Preens, Preenses of Preensenpaar net zoe un geweldig Carnavalseizoen es veer gehad höbbe. Blief dao bie veural euch zelluf, dan kump alles good! Nogmaals, ut waor geweldig! Dit gunt veer noets mie vergète!
Termaar en Mergraote, Alaaf, Nachdraversj en Nachdraverkes,
Alaaf, Carnaval, Alaaf
Preens Peter en Preenses Ingrid